MULING PAG-UUSAP

  

Dalawampung taon ang nakaraan

Dalawampung minutong binalikan

Waiter! Waiter! Paorder ng carbonara

"Boy! Boy! Tingnan mo aking saranggola!"

Yes, sir? Isang serve lang po ba?

Teka, teka, namumukhaan kita!

Boy! Boy! Ikaw ba iyan?

Kaylaki ng iyong asenso mula ng ating kabataan!

Oo nga't ako ito, sino ka na nga?

Ramdam ko'y may ala-ala tayo ng pagkabata!

Ngunit 'di ko mawari pangalan mo't mukha

Ikaw  nga ba si Ping na aking kababata?

Tama ka Boy! Ako nga ito

Aba't abugado kana, kaylaking pagbabago!

Hindi ko inaasahan, lugar na ito'y babalikan

Noong tayo'y bata pa, paborito natin itong kainan.

Naalala ko Ping! Ako'y lagi mong nililibre dito

Pagkat dati ako'y hamak lamang na dukha nitong mundo

At ikaw ay napakayaman, lahat ay kayang bilhin

Matatas na pangarap, kayang-kaya mong abutin.

Nasasariwa ko pa, Boy, ang pag-uusap natin noong araw

Habang pinapalipad natin ang saranggola kong bughaw

Ang giit mo sa'kin, ika'y mag-aaral ng mabuti

Ako nama'y walang kibo sa iyong mga sinasabi.

Sampung taon palang tayo noon, Ping

At sigurado akong, ikaw ngayo'y nagniningning

Tiyak bigtime ka na ngayon! Ano bang natapos mo?

Ako nama'y sa trial court nagtratrabaho bilang hurado

Boy, hindi ako nakapagtapos sa kolehiyo

Nalulong ako sa droga at sa lahat ng luho

Kayamanan ng pamilya ay aking winaldas

Kaya ngayon ni di ko maibili ang sarili ng bigas.

Naging iresponsable ako, at umasa sa pera ng magulang

Ako na kanilang anak ay may maraming pagkukulang

Nag-aksaya ako ng panahon, kasama ang marijuana

Alak, babae, sugal, buong buhay ipinusta.

Mapalad ka Boy, nakita mo ang daan

Nagawang mong makaahon mula sa kahirapan

Ako naman ang nalulugmok, gayong ako dati ay mayaman

Kaya eto sa sitwasyong 'di ko pinangarap kailanman.

Ping, kaya lang naman naabot ko ito

Dahil ang pag-aaral ay aking isinasapuso

Sapagkat kami ay mahirap dati at kayo ay mayaman

Tiniis ko ang pait, lahat ay aking pinagsikapan.

Kaybilis ng panahon, kailanlang bata pa tayong nag-uusap

Akala ko'y doktor ka na, ng mawari'y naging waiter ka

'Wag mong ikahiya ang trabaho mong marangal

Kahit papaano'y 'di ka pinabayaan ng Maykapal.

Alam kong malayo ito sa talagang gusto mo

Ngunit ikaw ngayon ang bunga ng sarili mong pagloloko

Ping, 'di pa huli, magsikap muli at ika'y mangarap

Inaasahan kong abot mo na ang tala, sa susunod nating pag-uusap!